Agjencia Europiane e Mbrojtjes Kufitare dhe Bregdetare, Frontex, ka nisur hetime zyrtare lidhur me shkeljet e dyshuara të të drejtave të njeriut nga autoritetet greke në kufijtë e saj. Nisma erdhi pas incidentit tragjik në fillim të prillit, ku shtatë emigrantë humbën jetën – mes tyre edhe dy fëmijë – pasi varka me të cilën udhëtonin dyshohet se u përplas qëllimisht nga një anije e rojes bregdetare greke.
Frontex e ka klasifikuar këtë ngjarje si “tepër serioze”, ndërkohë që në fokus të hetimeve janë praktikat e dëbimeve të refugjatëve pa proces të rregullt azili.
Greqia është akuzuar në mënyrë të përsëritur për kthime të detyruara të emigrantëve, kryesisht në ujërat turke, pa respektuar të drejtën për të kërkuar azil. Athina i ka mohuar me forcë këto akuza, duke deklaruar se nuk ekzistojnë dëbime sistematike dhe se çdo kërkesë për mbrojtje trajtohet individualisht.
“Nëse konfirmohen shkelje të tilla të ligjeve evropiane, ato do të kenë pasoja për punën tonë,” tha Lars Gerdes, zëvendësdrejtor ekzekutiv i Frontex-it, duke shtuar se nuk përjashtohet as mundësia që vetë agjencia të ketë mbyllur sytë ndaj shkeljeve të ndodhura në terren.
Nëse dyshimet për abuzime vërtetohen, Frontex mund t’i kërkojë Komisionit Europian pezullimin e ndihmës financiare për Greqinë ose nisjen e një procedure për shkelje të rregulloreve të BE-së. Po ashtu, agjencia mund të vendosë të tërheqë gradualisht mbështetjen operacionale – përfshirë forcat dhe pajisjet në terren.
Aktualisht, Frontex e mbështet Greqinë me rreth 700 efektivë kufitarë, automjete patrullimi, nëntë anije dhe një avion vëzhgimi.
