Bashkimi Europian po pret formimin e qeverisë së re në Kosovë për të rifilluar dialogun për integrimin e vendit. Komisionerja për Zgjerim e BE-së, Marta Kos, në një intervistë për Radion Evropa e Lirë, deklaroi se ngritja e institucioneve dhe normalizimi i marrëdhënieve me Serbinë janë parakushte për marrjen e statusit të vendit kandidat.
“Jemi në kontakt me politikanët në Prishtinë. Ata pretendojnë se janë në favor të normalizimit të marrëdhënieve me Serbinë, gjë që është kusht për nisjen e negociatave apo marrjen e statusit të kandidatit,” tha Kos.
Ndërkohë, në Kosovë, procesi i konstituimit të institucioneve vijon të zvarritet. Edhe seanca e tetë me radhë për formimin e Kuvendit dështoi për shkak të mungesës së kuorumit, duke thelluar ngërçin institucional pas zgjedhjeve.
E pyetur për mundësinë e heqjes së masave sanksionuese të vendosura ndaj Kosovës gjatë qeverisjes Kurti 2, Komisionerja Kos theksoi se ende nuk ka një dakordësi mes vendeve anëtare të BE-së.
“Nëse shtetet anëtare bien dakord për heqjen e tyre, sigurisht që do ta bëjmë. Por për momentin, jo të gjitha janë në favor të kësaj,” theksoi ajo.
Ajo komentoi edhe për Serbinë, duke nënvizuar se vendi duhet të rikthehet në rrugën europiane me vepra konkrete. “Serbia ka bërë shumë premtime, por tani duhet të shohim nëse po i zbaton ato,” tha Kos, duke përmendur rëndësinë e reformave në shtetin e së drejtës, luftën kundër korrupsionit dhe mediat.
Për rajonin, Kos vlerësoi progresin e Shqipërisë dhe Malit të Zi në procesin e integrimit, ndërsa kritikoi qasjen e liderëve si presidenti i entitetit të Republikës Serpska, me të cilët, sipas saj, është e vështirë të punohet.
