Një plagosje me thikë ka ndodhur ditën e djeshme në shkollën e mesme “Mustafa Hoxha” në Fier, ku një 17-vjeçar ka mbetur i plagosur. Sipas raportimeve, konflikti mes të rinjve ka nisur për shkak të disa fotografive të shpërndara në rrjetet sociale nga autori i dyshuar, B. D., 17 vjeç, të cilat, sipas të dëmtuarit, kishin të bënin me të. Policia ka arrestuar autorin e dyshuar për veprën penale “Vrasje me dashje”, e mbetur në tentativë, dhe po vijon hetimet për zbardhjen e plotë të ngjarjes.
Njoftimi i policisë:
Në vijim të informacionit paraprak të dhënë ditën e djeshme, për një plagosje thikë, në shkollën e mesme “Mustafa Hoxha”, Cakran, ku mbeti i plagosur shtetasi i mitur, 17 vjeç, ju informojmë se:
Specialistët për Hetimin e Krimeve të Rënda të DVP Fier nën drejtimin e Prokurorisë së Rrethit Gjyqësor Fier arrestuan autorin e dyshuar, shtetasin e mitur, B. D., 17 vjeç, për veprën penale “Vrasje me dashje”, e mbetur në tentativë.
Konflikti midis shtetasve të mitur ka nisur pasi shtetasi i dëmtur H. Xh., pretentonte se autori i dyshuar, shtetasi B. D., shpërndante në rrjetet sociale fotografi të tij.
Shtetasi H. Xh., aktualisht ndodhet në spital për ndihmë mjekësore, jashtë rrezikut për jetën
Mjeti prerës (thikë), u sekuestrua në cilësinë e provës materiale.
Materialet procedurale i kaluan Prokurorisë për veprime të mëtejshme.
