Agjencia e Mbikëqyrjes Policore (AMP) në rajonin Shkodër-Lezhë, në bashkëpunim me Prokurorinë e Shkallës së Parë të Shkodrës, ka ekzekutuar masat e sigurimit personal ndaj gjashtë punonjësve të policisë.
Ata dyshohen për shpërdorim detyre të kryer në bashkëpunim, për shkak të mos asgjësimit të rreth 1000 bimëve narkotike të gjetura gjatë një operacioni në korrik të këtij viti. Nënkomisarët Gjergj Mala dhe Ardian Baçina, si dhe inspektorët Faik Latifi, Kristjan Lokthi, Zef Doçi dhe Sokol Kroni janë pezulluar nga detyra dhe ndaluar për të dalë jashtë shtetit.
Hetimet kanë zbuluar se këta punonjës të policisë nuk kanë asgjësuar bimët narkotike të gjetura gjatë një kontrolli të territorit në Shalë të Shkodrës. AMP ka nisur një hetim të thelluar për këtë çështje.
Njoftimi i AMP:
Agjencia e Mbikëqyrjes Policore (Rajoni Shkodër-Lezhë) në bashkëpunim me Prokurorinë pranë Gjykatës së Shkallës së Parë të Juridiksionit të Përgjithshëm Shkodër, ka ekzekutuar masat e sigurimit personal "Pezullimi i ushtrimit të një detyre a shërbimi publik" dhe "Ndalim i daljes jashtë shtetit" ndaj 6️⃣ punonjësve të policisë, të dyshuar për kryerjen e veprës penale “Shpërdorimi i detyrës” e kryer në bashkëpunim.
Nënkomisar A.B., me detyrë Ekspert kriminalist pranë DVP Shkodër.
Inspektor S.K., me detyrë Ndihmës Specialist për Policimin në Komunitet në Komisariatin e Policisë Shkodër.
Inspektor Z.D., me detyrë Patrullë e Përgjithshme në Komisariatin e Policisë Shkodër.
Inspektor K.L., me detyrë Patrullë e Përgjithshme në Komisariatin e Policisë Shkodër.
Nënkomisar GJ.M., i cili në kohën e kryerjes së veprës penale qenë me detyrë Shef i Stacionit Policor në Theth, dhe aktualisht Zv/Shef Seksioni/Specialist në Seksionin Special të Ndërhyrjes Taktike në Njësinë Speciale “RENEA”.
Inspektor F.L., me detyrë Ndihmës Specialist për Policimin në Komunitet në Komisariatin e Policisë Shkodër.
Nga hetimet e thelluara disa mujore dyshohet se këta punonjës policie nuk kanë asgjësuar rreth 1000 bimë narkotike, të cilat u gjetën në proces tharje gjatë një operacioni të zhvilluar në Korrik të këtij viti, pavarësisht se janë konstatuar nga ana e tyre gjatë kontrollit të territorit në Njësinë Administrative Shalë, Bashkia –Shkodër.
