Protesta e 29-të kundër qeverisë dhe kryeministrit Edi Rama u zhvillua mbrëmjen e së dielës në Tiranë, duke ruajtur të njëjtin format të javëve të fundit. Qytetarët u mblodhën fillimisht në sheshin “Skënderbej”, marshuan drejt Kryeministrisë dhe, pas përfundimit të fjalimeve, vijuan marshimin në rrugët kryesore të kryeqytetit.
Gjatë tubimit u ritheksuan pesë kërkesat kryesore të protestuesve, me kërkesën e parë dhe të panegociueshme për dorëheqjen e kryeministrit dhe qeverisë. Një prej organizatorëve, Andi Tepelena, lexoi platformën e kërkesave, ndërsa kritikoi qeverinë për politikat mbi pronën, investimet strategjike dhe kërkoi reagim të qartë nga Bashkimi Europian, Shtetet e Bashkuara dhe SPAK.
Një moment që tërhoqi vëmendje ishte prezantimi publik i një platforme politike nga Grupi Koordinues, e cila parashikon krijimin e institucioneve të reja shoqërore si pjesë e vizionit për ndryshimin e sistemit politik.
Në podium pati edhe zëra kritikë ndaj vetë organizimit të protestës. Një student kundërshtoi platformën e propozuar nga Grupi Koordinues, duke argumentuar se protesta duhet të organizohet më mirë dhe të krijojë struktura të përhershme komunikimi, ndërsa theksoi se autokracitë nuk rrëzohen vetëm me protesta simbolike. Fjalimi i tij u ndërpre disa herë me fikjen e mikrofonit.
Në protestë mori pjesë edhe Sindi Manushi, kryebashkiakja shqiptare e Pieve di Cadore në Itali, e cila u shpreh se kishte ardhur si qytetare shqiptare për të mbështetur protestuesit dhe i ftoi ata të mos dorëzohen, por të vazhdojnë organizimin qytetar.
Ashtu si në ditët e mëparshme, organizatorët u bënë thirrje pjesëmarrësve të mos bien pre e provokimeve dhe të vijojnë protestën në mënyrë paqësore. Tubimi para Kryeministrisë u mbyll pa incidente, ndërsa protestuesit vazhduan marshimin në rrugët e Tiranës, duke konfirmuar se mobilizimi i tyre do të vijojë edhe në ditët në vazhdim.
