Kanë kaluar afro tre muaj nga zjarri që përfshiu pallatin e ndërtuar nga Armand Lilo përballë QSUT-së, por për dhjetëra familje pasojat vijojnë të jenë të rënda. Godina që u dogj me shpejtësi, duke lënë banorët pa banesa, vazhdon të mbetet pa një zgjidhje konkrete, ndërsa procesi i rikuperimit ende nuk ka nisur.
Pas ngjarjes që shkaktoi reagime të forta publike, kryeministri Edi Rama deklaroi se rindërtimi i pallatit do të realizohej nga firma ndërtuese “Arlis Construction”. Megjithatë, pavarësisht kalimit të muajve, banorët thonë se deri më tani nuk është ndërmarrë asnjë hap konkret për restaurimin e godinës apo kompensimin e dëmeve.
Familjet e prekura, të cilat investuan kursimet e një jete për të siguruar një apartament, vijojnë të jetojnë në pasiguri dhe pritje. Për ta, zjarri nuk shkatërroi vetëm banesat, por edhe sigurinë dhe stabilitetin e ndërtuar ndër vite.
Duket se edhe premtimi publik i kryeministrit ka mbetur pezull. Menjëherë pas ngjarjes, Rama deklaronte se pallati do të rindërtohej plotësisht nga vetë ndërtuesi.
“Pallati që u dogj dje në Tiranë, do të rindërtohet 100% nga vetë ndërtuesi, pavarësisht se nga të dhënat paraprake shkaku i zjarrit s’ka asnjë lidhje me vetë ndërtimin. Sepse ne nuk mund t’i lemë vetëm njerëzit e dëmtuar në pronën e tyre dhe nga ana tjetër, taksapaguesit nuk mund të paguajnë një dëm të cilin duhet ta paguanin sigurimet”, shprehej Rama në reagimin e tij publik pas ngjarjes.
Kryeministri theksonte gjithashtu rëndësinë e sigurimit të banesave nga fatkeqësitë dhe garantonte familjet e prekura se do të mbështeteshin deri në zgjidhjen e situatës.
Situata bëhet edhe më paradoksale, sipas banorëve, pasi ndërkohë që ata presin ende një përgjigje për fatin e shtëpive të tyre, biznesmeni Armand Lilo vijon aktivitetin në sektorin e ndërtimit. Firmat e lidhura me të vazhdojnë të zhvillojnë projekte të reja, ndërsa apartamentet tregtohen me çmime të larta në tregun imobiliar.
Banorët kërkojnë përgjegjësi dhe zbatim të premtimeve të bëra publikisht nga autoritetet. Ata theksojnë se një ngjarje e tillë nuk mund të mbyllet vetëm me deklarata për mediat, ndërsa pallati i djegur mbetet ende simbol i një premtimi të pambajtur dhe i pasigurisë që vazhdon të rëndojë mbi dhjetëra familje.
