Ministri i Bujqësisë, Andis Salla, reagoi për helmimin e 64 kursantëve në Akademinë e Sigurisë, duke bërë të ditur se institucionet përkatëse kanë marrë masa për izolimin dhe bllokimin e ambienteve të institucionit, ndërsa hetimet po vijojnë në bashkëpunim me Policinë e Shtetit dhe strukturat ligjzbatuese për të përcaktuar shkakun e ngjarjes dhe përgjegjësitë përkatëse.
Salla u përpoq të mbrojë kompaninë duke thënë se në rastin e parë, analizat nuk e kishin lidhur problematikën me ushqimin, por me mungesë higjiene. Ndërsa për rastin e dytë, ministri kërkoi durim, pasi sipas tij analizat e reja do të përcaktojnë shkakun e incidentit dhe masat që duhet të ndërmerren për parandalimin e situatave të ngjashme.
“Në helmimin e parë nuk rezultoi helmim nga ushqimet, por problematika lidhej me higjienën. Do të presim rezultatet e analizave që pritet të dalin sot për të përcaktuar shkakun e këtij rasti dhe për të identifikuar problematikën që duhet parandaluar përmes Autoritetit Kombëtar të Ushqimit”, tha ai.
Urojmë që kësaj radhe AKU, i drejtuar nga Blerina Gjylameti dhe institucionet në varësi të Sallës, të arrijnë të gjejnë shkakun e vërtetë dhe të mos kemi raste të treta, të katërta e me radhë, sepse bëhet fjalë për jetë njerëzish dhe jo numrash rendorë.
