Ka nisur në Tiranë dita e 26-të e protestës qytetare, me protestuesit që u grumbulluan fillimisht në sheshin “Skënderbej” për të marshuar më pas drejt bulevardit “Dëshmorët e Kombit”, ku mbajtën fjalimet para godinës së Kryeministrisë.
Gjatë tubimit, pjesëmarrësit përsëritën pesë kërkesat e protestës, duke kërkuar dorëheqjen e panegociueshme të Kryeministrit dhe të qeverisë, krijimin e një qeverie teknike tranzitore me mandat 12-mujor, ndryshime kushtetuese dhe zgjedhore, anulimin e ndryshimeve në ligjin për Zonat e Mbrojtura dhe Trashëgiminë Kulturore, shfuqizimin e Paketës së Maleve dhe ligjit për Investimet Strategjike, si edhe hartimin e një kontrate të re sociale mes qytetarëve dhe shtetit në konsultim me ekspertë, intelektualë dhe qytetarë apartiakë.
Gjatë fjalimeve u hodh edhe propozimi që protestat të zhvillohen edhe gjatë paradites, një ide që mbetet ende pa një vendimmarrje zyrtare.
Një prej protestuesve hodhi poshtë akuzat e përfaqësuesve të qeverisë se tubimet po dëmtojnë turizmin, duke deklaruar se protesta ka krijuar një model të ri promovimi për Shqipërinë.
“Kanë shumë ditë që po mundohen të na hedhin trutë e gomarit se po dëmtojmë turizmin. Ndërkohë ne jemi vendi i parë në botë që kemi shpikur turizmin e protestave. I kemi treguar botës se kemi njerëz mikpritës, të qytetëruar, që dinë të organizohen dhe të mbrojnë natyrën. Në fillim thanë se ishim ngritur kundër një resorti, por falë 25 ditëve të qëndresës kemi arritur t’ia thyejmë imazhin këtij kryeministri”, u shpreh ai.
Pas përfundimit të fjalimeve para Kryeministrisë, protestuesit nisën marshimin në rrugët kryesore të Tiranës, duke vijuar ditën e 26-të të protestës qytetare.
