Gjykata e Apelit ka lënë në fuqi dënimin e dhënë nga shkalla e parë në Lezhë me 30-vite burg, për 32-vjeçarin Albert Kaca, i cili përplasi për vdekje me makinë me dashje ish kunatin e tij, Ylli Mena në Ishull-Lezhë.
Pas shqyrtimit të çështjes në Apel, trupa gjykuese e kryesuar nga gjyqtari Fuat Vjerdha e cilësoi të drejtë vendimin, duke rrëzuar ankimin e palët mbrojtëse për të pandehurin.
Albert Kaca u cili vijon të jetë në arrati është gjetur fajtor për vepren penale “Vrasja e kryer brenda rrethit familjar”, ndërsa divorci i viktimës me motrën e autorit është bërë shkak i krimit të rëndë. Ylli Mena u aksidentua për vdekje me makinë mëngjesin e 21-shtatorit të vitit 2019-të, teksa po lëvizte në këmbë në Ishull-Lezhë.
Si shkak i plagëve të marra në disa pjesë të trupit, ai gjeti vdekjen disa ore pas ngjarjes në spitalin e Traumës në Tiranë.
Fillimisht ngjarja u raportua si aksidente rrugor, por pas hetimeve të kryera nga policia nën drejtimin e prokurorisë së Lezhës u arrit të provohet se kemi të bëjmë me një krim me dashje, ndërsa pavarësisht dyshimeve për përfshirjen e përsonave të tjere në këtë ngjarje nuk është arritur që ata të identifikohen.
