Autoritetet greke kanë zbuluar më shumë detaje rreth një grupi kriminal të përfshirë në trafikun e drogës, i cili u çmontua gjatë një megaoperacioni kundër drogës. Grupi përbëhej edhe nga shqiptarë dhe u zbulua pas analizës së bisedave të anëtarëve të tij nëpërmjet aplikacioneve të koduara, Sky ECC dhe EncroChat.
Në kuadër të këtij operacioni, janë arrestuar 24 persona, ndërsa 7 të tjerë janë shpallur në kërkim. Hetimi ka zbuluar se në dosjen hetimore janë të përfshirë 15 shtetas shqiptarë, përfshirë Aleksandër Sadikaj, i cili ka ndërruar jetë, si dhe shtetas nga Greqia, Rusia, Moldavia, Gjeorgjia dhe Kina. Ky grup kriminal përfshinte katër celula të ndara, të cilat ishin të angazhuara në trafikimin e lëndëve narkotike, përfshirë marijuanën dhe kokainën, si dhe pastrimin e parave. Ata akuzohen gjithashtu për armëmbajtje pa leje.
Sipas hetimeve, Aleksandër Sadikaj, i cili u ekzekutua në vitin 2022 në Sauk, është i dyshuari kryesor për trafikimin e 295 kg kanabis sativa gjatë periudhës 30 maj – 30 qershor 2020. Ky operacion i ka sjellë grupit një fitim prej rreth 45 mijë eurosh. Po ashtu, hetuesit kanë zbuluar një laborator për kultivimin e bimëve narkotike dhe janë dokumentuar 106 raste që lidhen me trafikimin dhe shpërndarjen e marijuanës dhe kokainës, përfshirë një tentativë vrasjeje të shtetasit Ari Papa në vitin 2021.
Operacionet e këtij grupi përfshinin transportin e drogës nga Shqipëria dhe Spanja, shpërndarjen në Greqi, si dhe pastrimin e parave të fituara nga veprimtaritë e paligjshme. Sipas hetimeve, vlera e trafikimit dhe shpërndarjes së drogës arrin në rreth 8.5 milionë euro.
