Kreu i PD, Sali Berisha, gjatë një komunikimi me qytetarët në rrjetet sociale është shprehur se deklarata e fundit e zv/presidentit amerikan JD Vance në konferencën e sigurisë në Mynih, ku ai përmendi arrestimin e liderëve të opozitës ishte një paralajmërim serioz për kryeministrin Edi Rama. Berisha u shpreh se katër muaj më parë një lajm ka qarkulluar mes ndërtuesve në Tiranë se 20 mijë banesa në kryeqytet do të bliheshin për llogari të palestinezëve që do të vinin në vendin tonë. Ai foli për akuzat e SPAK ndaj Ajola Xoxës, teksa u shpreh se propaganda synon të fshehë një vjedhje të rëndë prej 870 mijë eurosh për blerje garderobe. “Por vjedhjet për vila janë edhe më të mëdha. Është zbuluar se ata posedojnë tre vila dhe madje kanë rrafshuar njërën prej tyre për të krijuar më shumë hapësirë për argëtim,” deklaroi Berisha. Në konferencë Berisha foli edhe për planin e PD për kompensimin e plotë në mandatin e parë qeverisës së gjithë ish të përndjekurve politikë.
