Studiuesi dhe analisti Afrim Krasniqi ka risjellë në fokus një nga aksionet më të bujshme të qeverisë “Rama 1”, të nisur në tetor të vitit 2013: fushatën për kontrollin e territorit dhe ndalimin e ndërtimeve pa leje, veçanërisht në zonat bregdetare.
Në atë kohë, qeveria e sapoardhur në pushtet miratoi krijimin e një Task Force për mbrojtjen e territorit, nën drejtimin e ministrit të Brendshëm. Qëllimi ishte i qartë: ndalimi i abuzimit me hapësirat publike, ndëshkimi i shkelësve të ligjit dhe vendosja e rendit në zhvillimin urban.
Kryeministri i kohës deklaronte me forcë në Këshillin Kombëtar të Rregullimit të Territorit (KKRT):
“Bregdeti shqiptar, që është edhe një nga asetet më të mëdha që trashëgon ky vend, herë me leje dhe herë pa leje, është zhvilluar në një rrjedhë që përfundimisht duhet të ndërpritet.”
Sipas Krasniqit, atëherë kjo deklaratë gjeti mbështetje publike dhe profesionale. Kontrolli i territorit, lufta ndaj ndërtimeve abuzive dhe qasja antikorrupsion u konsideruan kushte minimale për shtetin e së drejtës, ekonominë e tregut dhe zhvillimin e qëndrueshëm.
Por bilanci pas 12 vitesh tregon një realitet tjetër.
"Jala 2013 – Jala 2025", thotë Krasniqi, është fotografia simbolike e dështimit. Task Forca që nisi me entuziazëm, përfundoi me skandale.
Disa nga figurat kryesore të aksionit përfunduan të akuzuar për korrupsion apo shpërdorim detyre. Njëri prej tyre, drejtues i Task Forcës, përfundoi në burg. Një tjetër, që koordinoi marrjen nën kontroll të zonave bregdetare, përfitoi vetë prona në zonat e pasura dhe më pas u bë deputet, duke u promovuar në funksione të larta brenda partisë.
Madje, sipas Krasniqit, "ai që premtoi fundin e masakrës bregdetare, me një të rënë të lapsit krijoi pronarë të rinj të detit dhe tokës. Vijat bregdetare u privatizuan, nga Velipoja në Butrint, në favor të klientëve të pushtetit."
Në analizën e tij, studiuesi e cilëson këtë proces si një ilustrim tipik të degradimit institucional dhe autoritarizmit të mbështetur në korrupsion.
"Rivendosja e ligjit? Ekonomia e tregut të lirë? Rilindja urbane? Zhvillimi i qëndrueshëm? Fundi i abuzimit? Ishin premtime. Pasi u përkthyen në vota, humbën funksionin dhe u kthyen në slogane për konsum publik," shkruan ai.
Afrim Krasniqi e përmbyll analizën me një mesazh të qartë:
"Kështu nisi!", duke vënë theksin se për të ndërtuar një shtet funksional, nuk mjaftojnë fushatat e bujshme dhe deklaratat e forta, por duhen institucione të pavarura, zbatim i ligjit dhe transparencë reale.
