Myrto Uzuni shkroi historinë sot me Granadën, duke u bërë lojtari i huaj që ka shënuar më shumë gola për këtë klub. Me 46 golat e tij, sulmuesi i Kombëtares shqiptare theu rekordin e El Arabit, duke e arritur këtë sukses në vetëm 103 ndeshje. Pas fitores 3-0 ndaj Racing Santander, klubi spanjoll e nderoi me një postim në rrjetet sociale për arritjen e tij.
Dy golat e shënuar sot erdhën kundër skuadrës që kryeson La Liga 2, ndërsa objektivi i Uzunit mbetet rikthimi i Granadës në elitën e futbollit spanjoll. Aktualisht, sulmuesi 29-vjeçar është i dyti në renditjen e golashënuesve të kampionatit me 11 gola, një më shumë se Luis Suarez i Almerias.
Në minutën e 58-të, Uzuni shpëtoi pozicionin jashtë loje dhe u nis drejt zonës kundërshtare me shpejtësi. Kur pa portierin që dilte nga pozita, ai tentoi një gjuajtje të mprehtë me të djathtën për ta çuar topin mbi të. Megjithatë, goditja u ndal nga traversa dhe topi shkoi jashtë, duke lënë të dëshpëruar sulmuesin për këtë mundësi të humbur për të shënuar një gol spektakolar.
