Kryeministri Edi Rama, ka reaguar pas akuzave kreut të PD, Sali Berisha, se ka shkelur ligjin elektoral me takimin e kreut të qeverisë me punonjësit e Bashkisë Tiranë si dhe bonusin e pranverës për pensionistët si mashtrim.
“Me paska denoncuar këneta për dy krime zgjedhore. E para paskam kryer krim me bonusin e pranverës për pensionistët, që është shpallur që vjet falë rritjes së fortë ekonomike dhe të ardhura që kanë kaluar parashikimet për 2024! Krime të tilla për pensionistët kam ndërmend të kryej akoma, madje edhe më të rënda se ky i marsit dua t’i bëj, këtë vit dhe në vitet në vijim, kështu që këneta të bëjë denoncimet e veta, ndërsa pensionistët e dinë vetë se ç’do t’i bëjnë kënetës më 11 maj” – shkruan ndër të tjera Rama.
Akuzat dhe kundërakuzat mes Berishës dhe Ramës janë bërë më të shpeshta ditët e fundit, kjo edhe për faktin që të mbajnë status quon në opinionin publik se pozita dhe opozita janë ata. Por përtej kësaj, kundërpërgjigjja e kryeministrit për pensionistët është thellësisht me nuancë elekorale.
Bonusi është mburrja e qeverisë për të sfumuar revoltën e pensionistëve por dhe për të mbuluar dështimin e socialistëve që në 12 vite qeverisje, nuk kanë bërë asnjë rritje të pensioneve. I ndodhur përball këtij fakti, Rama dhe qeveria e tij kanë vendosur që të joshin pensionistët me dy bonuse brenda pak muajsh, dhe njërin prej tyre do ta shpërndajnë dy muaj para zgjedhjeve.
Kjo është tallja e radhës që bëhet me moshën e tretë, por se sa efekt do të ketë një bonus për të marrë votën e pensionistëve, mbetet për t’u parë. Ndërsa të shpresojmë se “krime të tilla për pensionistët kam ndërmend të kryej akoma”, nuk do jetë një premtim që do lërë pensionet në Shqipëri në nivelin e vitit 2013.
