Kryetari i bashkisë së Tiranës, Veliaj, ka reaguar ndaj akuzave të ngritura ndaj tij, duke i cilësuar ato si “qesharake dhe të sajuara”. Ai u shpreh se nuk ka asgjë për të fshehur dhe se do të vazhdojë të denoncojë çdo padrejtësi.
Veliaj iu referua një prej akuzave ndaj tij, sipas së cilës ai ka ndikuar në emërimin e një zëvendësministreje si shpërblim për një udhëtim me avion në vitin 2004. Ai e cilësoi këtë pretendim si absurd, duke theksuar se zëvendësministrat emërohen nga këshilli i ministrave dhe jo nga ministri.
“Unë kam qenë në avione, në të cilët kanë hipur me mijëra njerëz në 20 vite, ndaj kjo provë është po aq e dobët sa karakteri banal i atyre që i shpikin këto histori”, tha Veliaj.
Gjithashtu, ai mbrojti punën e Genta Sulës, duke e cilësuar atë si një profesioniste të shkëlqyer, e cila ka kontribuar ndjeshëm në reforma të rëndësishme në fushën e punësimit dhe pensioneve.
“Tani po e kuptoj hezitimin e saj kur i thosha të kalonte në shtet. skuthat kompleksivë që nuk durojnë dot një grua të aftë, të pavarur e të lexuar, i sulen me shpifje”, tha ai.
Veliaj e mbylli reagimin e tij me mesazhin se “padrejtësia diku, kthehet në padrejtësi kudo” dhe se do të vazhdojë të luftojë për drejtësi.
