Qeveria e Kosovës ka bërë të ditur se është duke u përgatitur për të pritur dhe strehuar 50 persona të dëbuar nga Shtetet e Bashkuara të Amerikës, në zbatim të vendimit të ekzekutivit të datës 11 qershor. Ministria e Punëve të Brendshme (MPB) është në koordinim të ngushtë me autoritetet amerikane për realizimin pa pengesa të këtij procesi.
Sipas njoftimit zyrtar, bëhet fjalë për ofrim të mbrojtjes së përkohshme, e cila do të zgjasë një vit dhe do të vlerësohet në vazhdimësi në bazë të situatës në vendet e origjinës. Përzgjedhja e personave që do të strehohen në Kosovë do të bëhet në bashkëpunim të plotë me autoritetet amerikane, duke pasur parasysh kriteret e sigurisë kombëtare dhe rendit publik.
“MPB do të merret ndaras me çdo rast, ndërsa Kosova do të ofrojë kushte themelore jetese për personat në mbrojtje të përkohshme, përfshirë strehim, ushqim, veshmbathje, ndihmë higjienike dhe qasje në kujdes shëndetësor emergjent”, thuhet në deklaratë.
Qeveria përmend si precedent të suksesshëm rastet e mëparshme të strehimit të shtetasve afganë në vitin 2021 dhe qytetarëve ukrainas, në kuadër të bashkëpunimit me NATO-n dhe SHBA-të.
Në fund, ekzekutivi rikonfirmon përkushtimin e Kosovës si partner i qëndrueshëm i Shteteve të Bashkuara, duke shprehur mirënjohje për mbështetjen e tyre të vazhdueshme.
