Mijëra njerëz dolën në rrugë për të marrë pjesë në funeralin e Diogo Jota-s, sulmuesit të Liverpool-it dhe Kombëtares portugeze, i cili ndërroi jetë në moshën 28-vjeçare së bashku me vëllain e tij André (26), gjatë natës mes 2 dhe 3 korrikut, në një aksident rrugor. Dy arkivolat u transportuan nga kapela funerale në kishën famullitare të Gondomar-it, pak kilometra nga qendra e Portos, ku hyrja u lejua vetëm për familjarët dhe miqtë.
Ceremonia u transmetua drejtpërdrejt për të gjithë të pranishmit. Ndër ta ishte agjenti i futbollistit, i fuqishmi Jorge Mendes, i veshur tërësisht me të zeza, kapiteni i Manchester City-t Bernardo Silva — rival në Premier League, por bashkëlojtar në Kombëtare — dhe një delegacion i plotë i Liverpool-it, që hyri duke mbajtur dy kurora me lule në formë fanellash me numrat 20 (për Diogon) dhe 30 (për vëllain e tij).
Sipas asaj që është raportuar në Portugali, “The Reds” do të paguajnë pjesën e mbetur të kontratës së Diogo Jotës familjes së tij, pra dy vitet që kishin mbetur deri në përfundim të marrëveshjes.
Një detaj që, megjithatë, nuk mund ta ngushëllojë të venën e Diogos, Rute Cardoso (të dashuruar që nga shkolla kur ishin 15 vjeç, më pas tragjedia ndodhi vetëm 11 ditë pas martesës), e cila ishte pjesë e kortezhit mortor dhe u mbështet nga familjarët në skena thellësisht prekëse. E veshur me të bardha, ajo qëndronte e kapur pas pjesës së pasme të arkivolit të burrit, me një trëndafil ngjyrë krem në dorë.
