Gazeta italiane “Il Giornale” i ka kushtuar një artikull vendimit të Gjykatës së Romës lidhur me zbatimin e marrëveshjes mes Shqipërisë dhe Italisë për emigrantët. Vendimi i marrë nga gjyqtarët e Romës është referuar edhe Gjykatës Europiane të Drejtësisë për shqyrtim të mëtejshëm.
Sipas raportimeve të medias italiane, ekzistojnë dyshime se kampet në Shëngjin dhe Gjadër do të funksionojnë si qendra të mbyllura për emigrantët e kapur në brigjet italiane, të paktën deri në korrik të vitit të ardhshëm. Për pasojë, mëngjesin e të martës, shtatë emigrantë nga Egjipti dhe Bangladeshi u transferuan në portin italian të Brindisit. Ndërkohë, më 18 tetor, e njëjta gjykatë vendosi që 12 emigrantët, të cilët ishin pjesë e grupit të parë të dërguar në Shqipëri sipas marrëveshjes për azilkërkuesit mes qeverive të të dy vendeve, të rikthehen në Itali.
