Një ngjarje e rëndë është shënuar në burgun famëkeq të Koridhallos në Greqi, ku një i burgosur shqiptar ka marrë peng për disa minuta dy roje burgu dhe ka tentuar të kryejë një atentat ndaj një tjetër të burgosuri shqiptar.
Sipas televizionit grek ALPHA, i burgosuri arriti t’u marrë rojeve çelësat, radiot dhe telefonat, duke i mbyllur brenda një dhome. Më pas, ai ka hapur disa porta të burgut dhe ka ecur për rreth 150 metra drejt Repartit C, në kërkim të një bashkëkombësi të tij, i dënuar për trafik narkotikësh, me qëllim vrasjen e tij.
Burimet e Alpha e identifikojnë autorin si një emër të njohur të mafias shqiptare, i dënuar për tentativë vrasjeje. Ngjarja dyshohet të ketë qenë një porosi për vrasje me pagesë që dështoi për shkak të ndërhyrjes në kohë të autoriteteve të burgut.
Emrat e personave të përfshirë nuk janë bërë publikë.
