Gjykata e Lezhës i komunikoi masën e sigurisë “arrest me burg” Besnik Koldreut. Ai dyshohet si bashkëpunëtor i autorëve të vrasjes së çiftit Kreshnik dhe Gentjana Mujeci në Balldren të Lezhës. Gjatë seancës me dyer të mbyllura, Koldreu pretendoi se nuk kishte asnjë lidhje me ngjarjen.
Ai ka deklaruar se punon prej vitesh në Mal të Zi, ku edhe u arrestua, dhe se nuk kishte asnjë dijeni se si automjeti i përdorur në ngjarje u gjet në ambientet e jashtme të banesës së tij në Torovicë. Koldreu u arrestua në Ulqin gjatë një aksioni të përbashkët mes dy policive.
Ai ishte shpallur në kërkim pasi Gjykata e Lezhës kishte caktuar masën e sigurisë “arrest me burg” në mungesë. Ndërkohë, Renato Mhillaj, Florin Mhillaj dhe Adriano Mhillaj, të dyshuar si ekzekutorë të çiftit Mujeci, vijojnë ende të jenë në arrati.
Vrasja e çiftit ndodhi më 26 prill në aksin rrugor Balldre–Torovicë, teksa po udhëtonin me automjetin e tyre për në banesë, pasi kishin festuar një festë fetare. Sipas prokurorisë, krimi ka si motiv gjakmarrjen, pasi Kreshnik Mujeci kishte qenë i dyshuar, bashkë me kushëririn Jozef Mujeci, për vrasjen e Genc Mhillaj. Kreshnik Mujeci ishte shpallur i pafajshëm për këtë ngjarje.
