Familjarët e Leo Sadikut, i cili ndërroi jetë më 8 janar në Pediatrinë e QSUT-së, kërkojnë kryerjen e autopsisë. Nëna e të miturit ka deklaruar për News 24 se dëshiron një autopsi për të zbuluar shkakun e saktë të vdekjes. Ata i janë drejtuar Prokurorisë së Tiranës me një shkresë më 3 shkurt, por nuk ka pasur ende asnjë veprim. 12-vjeçari u shtrua fillimisht në spitalin e Korçës më 28 dhjetor me shenja gripi. Pas një përmirësimi të përkohshëm, ai u rikthye në spital më 7 janar me simptoma të rënda. Ai u dërgua në Pediatrinë e QSUT-së, ku ndërroi jetë një ditë më pas. Sipas QSUT-së, shkaku i vdekjes ishte miokarditi akut, një sëmundje e rrallë dhe e rrezikshme. Familjarët dyshojnë për neglizhencë nga ana e mjekëve dhe kërkojnë hetim të plotë. Ata i bëjnë thirrje autoriteteve të përshpejtojnë procedurat për zbardhjen e së vërtetës. Prokuroria ende nuk ka ndërmarrë asnjë hap për kryerjen e autopsisë.
