WhatsApp po përgatit një funksion të ri për përdoruesit e iPhone, i cili pritet të lehtësojë ndjeshëm gjetjen e fotografive, videove, lidhjeve dhe dokumenteve të shkëmbyera në biseda. Bëhet fjalë për Media Hub, një hapësirë të dedikuar ku përdoruesit do të mund të shohin dhe organizojnë materialet e marra, pa pasur nevojë të kërkojnë mesazhet një nga një.
Funksioni ishte prezantuar më herët në versionet e WhatsApp-it për Mac dhe ueb, ndërsa së fundmi është zbuluar edhe në versionin beta për iOS.
Media Hub do të jetë i aksesueshëm përmes cilësimeve të aplikacionit dhe do të përmbledhë në një vend të vetëm materialet mediatike të pranuara në biseda. Megjithatë, në këtë hapësirë nuk do të shfaqen përmbajtjet e dërguara nga vetë përdoruesi, si dhe mesazhet apo materialet që zhduken automatikisht pas një periudhe të caktuar.
Platforma do të ndahet në dy seksione kryesore. Te “New” do të shfaqen materialet e marra së fundmi, ndërsa “All media” do të përmbajë të gjitha fotografitë, videot dhe përmbajtjet e tjera të disponueshme. Përdoruesit do të kenë mundësi t’i filtrojnë materialet sipas kategorisë, të zgjedhin paraqitjen në formë liste ose rrjeti, si dhe të veçojnë ato që u interesojnë.
Për secilin material do të ofrohen disa mundësi ndërveprimi, si përcjellja në një bisedë tjetër, reagimi, shënimi me yll dhe kalimi i drejtpërdrejtë te biseda ku është marrë fillimisht përmbajtja.
Një tjetër risi e rëndësishme do të jetë kërkimi i integruar, i cili do të ndihmojë në gjetjen e fotografive, videove dhe lidhjeve përmes përshkrimeve të tyre. Në këtë mënyrë, përdoruesit do të mund të rikthejnë materiale të shkëmbyera edhe nëse nuk mbajnë mend se në cilën bisedë apo në çfarë kohe i kanë marrë.
Pavarësisht se është zbuluar në versionin beta për iOS, Media Hub është ende në zhvillim dhe nuk është i disponueshëm për testuesit. WhatsApp pritet ta provojë fillimisht me një grup të kufizuar përdoruesish në përditësimet e ardhshme, përpara se të vendosë për shpërndarjen e tij për të gjithë përdoruesit e iPhone.
