Për të gjashtën të shtunë radhazi, qytetarë të Vlorës janë mbledhur përpara kantierit të Muzeut Hebraik, në qendrën historike të qytetit, për të kundërshtuar projektin dhe për të kërkuar ndërprerjen e punimeve.
Gjatë protestës, pjesëmarrësit akuzuan qeverinë Rama se po dëmton trashëgiminë historike dhe kulturore të qytetit për interesa politike dhe personale. Në fjalimet e mbajtura pati edhe akuza të forta ndaj qeverisë, të cilën disa prej protestuesve e akuzuan për tradhti kombëtare.
Përfaqësues të grupit nismëtar njoftuan se gjatë kësaj jave kanë depozituar në gjykatë një kërkesëpadi lidhur me shkeljet ligjore që pretendojnë se janë konstatuar në realizimin e projektit.
Sipas organizatorëve, javën e ardhshme pritet një vendimmarrje paraprake e gjykatës lidhur me kërkesën për pezullimin e punimeve.
Gjatë tubimit pati thirrje për rrëzimin e gardhit rrethues të kantierit. Në përfundim të protestës, disa pjesëmarrës tentuan ta rrëzonin atë, por ndërhyrja e policisë pengoi realizimin e kësaj përpjekjeje.
Protesta u mbyll me thirrje drejtuar Policisë së Shtetit dhe me kërkesën për të pritur vendimin e gjykatës përpara ndërmarrjes së veprimeve të tjera.
Organizatorët njoftuan gjithashtu se të shtunën e ardhshme mund të zhvillohet një protestë kombëtare në të njëjtin vend, në varësi të zhvillimeve dhe vendimit të gjykatës.
