Elisa Spiropali ka zgjedhur sërish të flasë përmes mungesës së saj. Pas letrës publike ku i kërkoi Edi Ramës të hapte rrugën për një zgjidhje politike, ajo nuk mori pjesë në mbledhjen e sotme të Grupit Parlamentar të Partisë Socialiste, të drejtuar nga kryeministri.
Spiropali ishte e vetmja deputete që mungoi në mbledhje. Arsyeja nuk është bërë e ditur, ndaj mbetet e paqartë nëse bëhet fjalë për një bojkot politik apo për një mungesë të motivuar ndryshe. Megjithatë, pikërisht aty ajo kishte mundësinë t’ia shprehte Ramës drejtpërdrejt kundërshtimet e saj.
Më 16 tetor, përmes një letre publike, ish-ministrja e Jashtme i kërkoi kryeministrit të reflektonte për protestat, të merrte përgjegjësi për krizën dhe të mos përdorte shumicën parlamentare si mburojë ndaj pakënaqësisë qytetare. Ajo theksoi se as zgjedhjet e parakohshme, as rotacioni politik nuk duhet të konsiderohen tabu.
Kjo nuk është përplasja e parë mes tyre. Në muajt e fundit, Spiropali ka kritikuar mënyrën e drejtimit të Partisë Socialiste dhe trajtimin e zërave kundërshtues. Në prill, pas paralajmërimit për përjashtim nga grupi, ajo i kërkoi publikisht Ramës ta përjashtonte nëse nuk respektohej e drejta e saj për të folur.
Por kundërshtimet publike nuk janë shoqëruar gjithmonë me votë kundër në Kuvend. Edhe për nisma që i ka kritikuar, përfshirë reformën territoriale, Spiropali ka votuar në përputhje me qëndrimin e shumicës socialiste.
Këtu lind edhe pyetja për peshën reale të qëndrimit të saj politik. Mungesa në mbledhjen e grupit mund të interpretohet si distancim, por pa një shpjegim publik nuk mund të përcaktohet nëse ishte një akt i qëllimshëm kundërshtimi.
Përballja politike nuk matet vetëm me deklarata apo me një karrige bosh. Ajo kërkon qëndrime të qarta, argumente të shprehura drejtpërdrejt dhe vendime parlamentare që përputhen me bindjet e deklaruara.
Sepse nëse i kërkon Ramës të hapë rrugën, por sa herë vjen puna te vota vazhdon t’ia hapësh ti rrugën atij, atëherë rebelimi yt mbetet vetëm në fjalë. Dhe në këtë rast, Spiropali nuk është gjë tjetër veçse një Erion Braçe në version femër.
