Një shpërthim me lëndë plasëse është regjistruar mëngjesin e sotëm në Bathore të Kamzës, duke shkaktuar dëme materiale në një banesë dhe në një automjet të parkuar pranë saj.
Sipas njoftimit të policisë, ngjarja ka ndodhur rreth orës 05:05, në lagjen nr. 1, ku persona ende të paidentifikuar dyshohet se kanë vendosur një sasi lënde plasëse në murin rrethues të banesës së Xhelal Kurtit, rreth 55 vjeç.
Si pasojë e shpërthimit, është dëmtuar muri rrethues i banesës, si dhe një automjet në pronësi të djalit të 55-vjeçarit, i cili ndodhej i parkuar pranë derës së shtëpisë.
Fatmirësisht, nga shpërthimi nuk raportohet për persona të lënduar, por vetëm dëme materiale.
Ende nuk dihen motivet e ngjarjes, ndërsa pritet që hetimet të zbardhin rrethanat dhe të identifikojnë autorët e dyshuar.
