Protesta e zhvilluar këtë të enjte përpara Kuvendit të Shqipërisë është shoqëruar me tensione dhe përplasje mes qytetarëve dhe forcave të policisë.
Gjatë përplasjes, efektivët e policisë kanë përdorur spraj lotsjellës në sasi të konsiderueshme për të larguar protestuesit nga perimetri i sigurisë i vendosur rreth Parlamentit.
Si pasojë, disa qytetarë kanë shfaqur shqetësime shëndetësore dhe janë detyruar të largohen nga zona e prekur nga spraji.
Situata është tensionuar pranë barrierave metalike të vendosura nga policia, ku protestuesit kanë kundërshtuar kufizimet dhe u kanë kërkuar efektivëve të mos pengojnë zhvillimin e tubimit.
Në ambientet përreth Kuvendit janë dislokuar forca të shumta policie, ndërsa tensionet mes protestuesve dhe efektivëve kanë vijuar.
