Kryetari i Bashkisë së Kamzës, Rakip Suli, ka reaguar përmes një postimi në rrjetet sociale lidhur me raportimet mediatike për procesin mësimor në territorin që ai drejton, duke kërkuar nga mediat që të mos keqpërdorin situatën e krijuar.
Përmes një deklarate publike, Suli u ka bërë thirrje medieve që të mos keqpërdorin rastin e rreth 50 fëmijëve në Kamëz, situatë e cila sipas tij është nxitur nga manipulimet në rrjetet sociale.
Kryebashkiaku ka siguruar se procesi mësimor po vijon normalisht në të gjitha institucionet arsimore të bashkisë:
"Në të 25 shkollat e Kamzës, mësimi vijon normalisht, kështu që ftojmë mediat të vijnë dhe të verifikojnë nga afër vijimin normal të procesit mësimor në të gjitha shkollat e Kamzës."
Më tej, Suli ka falënderuar Kryeministrin Edi Rama, duke deklaruar se falë mbështetjes së tij, sot shkollat e Kamzës janë shndërruar në institucione me standarde të Bashkimit Europian.
