Prokuroria e Specializuar në Hagë ka kërkuar dënim me 45 vite burg për ish-krerët e UÇK-së, Hashim Thaçi, Kadri Veseli, Jakup Krasniqi dhe Rexhep Selimi, gjatë seancës ku ka nisur faza përfundimtare e procesit gjyqësor në Dhomat e Specializuara të Kosovës.
Kërkesa për dënimin është paraqitur nga kryeprokurorja Kimberly West gjatë fjalëve përfundimtare. Sipas saj, Zyra e Prokurorit të Specializuar kërkon dënim për persona konkretë dhe jo për strukturat e UÇK-së, duke kërkuar që secili prej të akuzuarve të shpallet fajtor për të gjitha pikat e aktakuzës, me dënim prej 45 vitesh burg, bazuar në kontributet individuale të secilit.
Prokuroria theksoi se akuzat lidhen me krime lufte dhe krime kundër njerëzimit, duke i cilësuar ato si shumë të rënda në natyrë. Sipas saj, pesha e këtyre krimeve nuk zbehet me kalimin e kohës dhe mbetet e rëndë edhe sot.
Procesi ndaj katër ish-krerëve të UÇK-së konsiderohet si një nga proceset më të mëdha gjyqësore në Dhomat e Specializuara të Kosovës.
