Në Gjykatën Speciale në Hagë ka nisur dëshminë eksperti amerikan Paul Williams, pas përfundimit të dëshmisë tre-ditore të ish-diplomatit amerikan James Rubin. Në këtë proces gjyqësor po gjykohen ish-krerët e Ushtrisë Çlirimtare të Kosovës, Hashim Thaçi, Kadri Veseli, Jakup Krasniqi dhe Rexhep Selimi. Gjatë seancës së sotme, Williams – i cili në kohën e Konferencës së Rambujesë shërbente si këshilltar i delegacionit kosovar – u pyet për rolin e ish-presidentit Hashim Thaçi në atë periudhë, si dhe për kompetencat e tij brenda strukturave të UÇK-së. Në dëshminë e tij, Williams theksoi se Thaçi nuk kishte autoritet të vetëm për të dhënë pëlqimin mbi marrëveshjet, pasi çdo vendim duhej të miratohej nga komandantët e zonave të UÇK-së.
“Mund t’ju them se ishte shumë e qartë që ai ishte një përfaqësues i UÇK-së dhe ishte zëri i saj në atë kështjellë. E kuptova që s’kishte autoritet për të dhënë pëlqimin mbi marrëveshjen”, deklaroi Williams.
Dëshmia e tij pason atë të James Rubin, i cili këtë javë përfundoi dëshminë pas tre ditësh para trupës gjykuese, duke sjellë një tjetër këndvështrim mbi rolin e ish-drejtuesve të UÇK-së në proceset vendimtare të asaj kohe. Procesi në Hagë pritet të vazhdojë me thirrjen e dëshmitarëve të tjerë të rëndësishëm, ndërsa akuzat ndaj ish-drejtuesve të UÇK-së mbeten në qendër të vëmendjes së opinionit publik dhe ndërkombëtar.
