Një qenush vetëm gjashtë muajsh është kthyer në hero në Kinë, pasi ndihmoi në shpëtimin e të zonjës së tij pas një aksidenti rrugor. Kafsha pa momentin kur gruaja u përplas nga një automjet teksa udhëtonte me skuter elektrik dhe, në vend që të largohej, vrapoi drejt shtëpisë për të kërkuar ndihmë.
Sipas pamjeve të kamerave të sigurisë dhe raportimeve lokale, qeni hyri me shpejtësi në banesë, gjeti bashkëshortin e gruas dhe filloi ta tërhiqte nga rrobat, duke lehur vazhdimisht. Fillimisht burri nuk e kuptoi çfarë po ndodhte, por vendosi ta ndiqte kafshën. Qeni e çoi drejt vendit të aksidentit, ku gruaja ndodhej e plagosur në tokë.
Falë reagimit të shpejtë, familjarët njoftuan menjëherë ambulancën dhe gruaja mori ndihmën mjekësore në kohë. Videoja është bërë virale në rrjetet sociale kineze dhe është shpërndarë edhe nga Reuters, ku shumë e kanë cilësuar qenin një “hero me katër putra”.
