Autoritetet franceze kanë vendosur të pezullojnë përkohësisht përdorimin e granatave shokuese nga policia gjatë protestave të nxënësve, pas plagosjes së rëndë të një 15-vjeçari që humbi njërën dorë gjatë përplasjeve me forcat e rendit.
Vendimi u njoftua nga ministri i Brendshëm, Laurent Nuñez, ndërsa Franca po përballet me një valë protestash që kanë përfshirë qindra shkolla dhe mijëra të rinj në mbarë vendin.
Incidenti më i rëndë u regjistrua në qytetin Lens, në veri të Francës, ku një 15-vjeçar pësoi dëmtime të rënda gjatë ndërhyrjes së policisë. Autoritetet kanë hapur hetim për të përcaktuar rrethanat e ngjarjes dhe nëse plagosja u shkaktua nga një granatë shokuese.
Pezullimi i përdorimit të këtyre mjeteve do të mbetet në fuqi derisa të sqarohen rrethanat e incidentit.
Protestat nisën për shkak të kushteve të këqija në institucionet arsimore, mungesës së mësuesve, mbipopullimit të klasave dhe problemeve me infrastrukturën shkollore.
Brenda pak javësh, lëvizja u përhap në të gjithë Francën, duke përfshirë edhe studentë universitarë, prindër, mësues dhe organizata sindikale.
Sipas të dhënave të raportuara nga The Guardian, mbi 6,600 persona, shumica të mitur, janë arrestuar që nga fillimi i trazirave, ndërsa afro 1,500 prej tyre përballen me procedime penale.
Bilanci i të plagosurve përfshin 215 nxënës, 89 punonjës të shkollave dhe 761 efektivë policie. Autoritetet kanë nisur gjithashtu 18 hetime të brendshme për veprimet e forcave të rendit.
Ministri Nuñez ka hedhur poshtë akuzat për një politikë sistematike të dhunës policore, duke argumentuar se efektivët kanë ndërhyrë në situata ku protestat janë shoqëruar me përplasje dhe dëmtime të pronës.
Nga ana tjetër, organizatat për mbrojtjen e të drejtave të njeriut, përfshirë Amnesty International në Francë, kanë mirëpritur pezullimin e granatave shokuese, por kërkojnë ndalimin e përhershëm të përdorimit të tyre gjatë protestave.
Kryeministri francez Sébastien Lecornu ka pranuar se kërkesat e nxënësve për përmirësimin e kushteve arsimore janë legjitime dhe ka premtuar një plan masash deri në fund të tetorit.
Megjithatë, tensionet mbeten të larta, ndërsa sindikatat studentore kanë paralajmëruar vazhdimin e mobilizimit për të kërkuar më shumë investime në arsim dhe garanci për sigurinë e nxënësve gjatë demonstratave.
