Christa Pike, e dënuara me vdekje në Tennessee të SHBA-së, është zgjuar pas gjashtë ditësh pa ndjenja, pasi i mbijetoi një tentative ekzekutimi me injeksion vdekjeprurës.
Avokati i saj, Randy Spivey, bëri të ditur se 50-vjeçarja ka rifituar vetëdijen dhe ka nisur të komunikojë, por gjendja e saj shëndetësore mbetet serioze. Ajo po përballet me disa komplikacione, mes tyre pneumoni, mpiksje gjaku, vështirësi në gëlltitje dhe probleme me lëvizjen e krahëve.
Sipas avokatit, pjesa më e madhe e pentobarbitalit të përdorur gjatë procedurës përfundoi në indet e krahut dhe jo siç ishte parashikuar në qarkullimin e gjakut. Për pasojë, ilaçi e la Pike pa ndjenja, por nuk shkaktoi ndalimin e zemrës apo frymëmarrjes.
Fillimisht ishte raportuar se ajo kishte pësuar vdekje të trurit dhe se do t’i hiqeshin aparaturat që e mbanin në jetë. Megjithatë, të nesërmen Pike u zgjua në spital dhe, sipas avokatit, pyeti: “Ku jam dhe kush jeni ju?”
Ekipi ligjor pretendon se kishte paralajmëruar më herët për komplikacione të mundshme për shkak të problemeve të saj me venat. Një gjykatë në Tennessee ka urdhëruar ndërkohë ruajtjen e të gjitha provave që lidhen me procedurën e dështuar të ekzekutimit.
Pike është dënuar me vdekje për një vrasje të kryer rreth tri dekada më parë. Pas ngjarjes, ajo pritet të përballet me një periudhë të gjatë rikuperimi, ndërsa çështja e saj ligjore vazhdon.
