Vetëm dy ditë pasi Apeli i Posaçëm shpalli vendimin ndaj anëtarëve të grupit të Bruno Çobos, në çështjen e njohur të “call center”-ave, pesë prej të dënuarve i janë drejtuar Gjykatës së Posaçme duke kërkuar shtyrjen e ekzekutimit të vendimit.
Sipas të dhënave, kërkesa është paraqitur nga Elisa Çaçi, e dënuar me 7 vite e 4 muaj burg, si dhe Rezarta Ibrahimi, Greta Pepa, Antoneta Malo dhe Silvana Veliu, të dënuara secila me nga 6 vite e 8 muaj burg.
Në kërkesën e tyre, të dënuarat kanë paraqitur si argument rrethanat familjare dhe kujdesin ndaj fëmijëve.
Objekti i kërkesës është “shtyrja e ekzekutimit të vendimit, kur vuajtja e menjëhershme mund të ketë pasoja të rënda për të dënuarin ose familjen”.
Tashmë pritet që Gjykata e Posaçme të shqyrtojë kërkesën dhe të vendosë nëse plotësohen kushtet për shtyrjen e ekzekutimit të dënimeve.
