Qentë janë në gjendje të dallojnë emocionet e njerëzve vetëm duke parë shprehjen e fytyrës. Një studim i ri i Universitetit të Vjenës ka zbuluar përmes skanimeve të trurit se ata reagojnë në mënyra të ndryshme ndaj fytyrave të lumtura, të frikësuara, të trishtuara apo të zemëruara.
Në eksperiment, studiuesit përdorën rezonancë magnetike funksionale për të monitoruar trurin e qenve ndërsa atyre u shfaqeshin fotografi të njerëzve të panjohur me shprehje të ndryshme emocionale. Analiza e aktivitetit të trurit u krye edhe me ndihmën e teknikave të inteligjencës artificiale.
Rezultatet treguan se fytyrat e lumtura aktivizonin zona të trurit të lidhura me përpunimin e informacionit dhe sistemin e shpërblimit. Por zbulimi më interesant erdhi kur shkencëtarët analizuan reagimet ndaj emocioneve negative.
Truri i qenve shfaqte modele të ndryshme aktiviteti kur ata shihnin një fytyrë të frikësuar krahasuar me një fytyrë të zemëruar ose të trishtuar. Megjithatë, dallimi mes zemërimit dhe trishtimit rezultoi më pak i qartë, duke sugjeruar se në situata të tilla qentë mund të mbështeten edhe te sinjale të tjera, si toni i zërit apo gjuha e trupit.
Studiuesit thonë se rezultatet ofrojnë prova të drejtpërdrejta se truri i qenit është në gjendje të bëjë dallime mes disa prej emocioneve që shfaqen në fytyrën e njeriut.
Sipas tyre, kjo aftësi mund të jetë zhvilluar gjatë mijëra viteve të bashkëjetesës mes qenve dhe njerëzve. Pikërisht kjo histori e gjatë mund t’i ketë bërë qentë veçanërisht të ndjeshëm ndaj sinjaleve emocionale të njeriut dhe të aftë të përshtatin sjelljen e tyre me atë që shohin tek ne.
Studimi hap tashmë një tjetër pyetje: sa shumë kuptojnë qentë nga emocionet tona dhe si i kombinojnë shprehjet e fytyrës me zërin, lëvizjet e trupit dhe madje edhe aromën për të kuptuar se çfarë po ndiejmë?
