Aktori amerikan Sean Penn ka fituar Oscarin e tretë në karrierën e tij për rolin në filmin “Një betejë pas tjetrës” por nuk ishte i pranishëm në ceremoninë e ndarjes së çmimeve në Dolby Theatre.
Penn u vlerësua për interpretimin e kolonelit Lockjaw, një personazh thellësisht racist dhe i dhunshëm, i veshur vazhdimisht me uniformë ushtarake, në filmin që triumfoi në mbrëmjen e Academy Award. Megjithatë, statuja nuk u mor nga vetë aktori, pasi ai mungoi në ceremoni.
Çmimin e pranoi në skenë aktori Kieran Culkin, i cili tha se Penn “nuk mundi ose nuk deshi të ishte këtu me ne, ndaj do ta pranoj unë për të”.
I njohur për distancën që mban nga spektaklet e Hollywood-it, Penn këtë sezon çmimesh është parë shumë pak në publik. Ai u shfaq vetëm në Golden Globe Awards, ndërsa mungoi në shumicën e eventeve të tjera të industrisë së filmit.
Aktori dhe regjisori kishte fituar më parë dy çmime Oscar për rolet në filmat Mystic River dhe Milk.
Sipas burimeve të cituara nga The New York Times, Penn mund të jetë aktualisht në udhëtim drejt Evropës dhe pritet të shkojë në Ukrainë. Ai ka qenë një nga mbështetësit më të zëshëm të Ukrainës në luftën kundër Rusisë dhe në të kaluarën ka dhuruar një nga Oscarët e tij për këtë kauzë.
