Presidenti i Partisë së Lirisë, Ilir Meta, ka reaguar ndaj ngërçit të krijuar mes Gjykatës së Posaçme dhe Dhomës Kombëtare të Avokatisë, duke akuzuar institucionet përgjegjëse për mungesë reagimi dhe duke pretenduar se pas konfliktit qëndrojnë interesa politike.
Meta ka kritikuar Kuvendin dhe Këshillin e Lartë Gjyqësor (KLGJ), ndërsa e ka cilësuar situatën si një pengesë serioze për funksionimin e drejtësisë dhe garantimin e të drejtave të qytetarëve që përballen me procese gjyqësore.
Sipas ish-presidentit, përplasja mes dy institucioneve ka sjellë shtyrjen e qindra seancave gjyqësore, duke cenuar të drejtën e të pandehurve për një proces të rregullt ligjor dhe duke krijuar pasoja për personat që ndodhen në paraburgim.
Meta ka kërkuar ndërhyrjen e institucioneve për zgjidhjen e situatës, ndërsa ka mbështetur nismën ligjore të paraqitur nga Partia e Lirisë për t'i dhënë fund konfliktit. Ai pretendon se ngërçi është i qëllimshëm dhe ka prapavijë politike.
Konflikti mes GJKKO-së dhe Dhomës Kombëtare të Avokatisë nisi pas miratimit të një rregulloreje që ndalon mbajtjen dhe përdorimin e telefonave celularë në sallat e gjykimit. Avokatët e kundërshtojnë këtë masë, me argumentin se pengon ushtrimin e profesionit, ndërsa gjykata këmbëngul se rregullat zbatohen njësoj për të gjithë pjesëmarrësit në proces.
Bojkoti i nisur në shtator ka shkaktuar shtyrjen e qindra seancave gjyqësore, përfshirë edhe procesin ndaj Ilir Metës dhe Monika Kryemadhit.
