Lideri i Partisë Demokratët në Izrael, Yair Golan ka kritikuar vrasjen e udhëheqësit suprem të Iranit, Ali Khamenei, duke e cilësuar atë si një gabim strategjik që nuk i shërben interesave afatgjata të Izraelit.
Golan sqaroi se qëndrimi i tij nuk lidhet me faktin nëse Khamenei e meritonte apo jo vdekjen, por me pasojat që eliminimi i tij mund të ketë për sigurinë dhe interesat e vendit. “Pa asnjë dyshim, mendoj se eliminimi i Khameneit ishte gabim, jo sepse ai nuk e meritonte të vdiste, por sepse kjo nuk u shërben interesave të Izraelit”, deklaroi ai, sipas The Times of Israel.
Sipas tij, pas vrasjes së Khameneit, Irani ka mbetur nën ndikimin e figurave edhe më radikale dhe të dhunshme. Golan argumentoi se pasardhësi i tij, Mojtaba Khamenei, ndodhet nën kontrollin e qarqeve më ekstremiste të strukturës së sigurisë iraniane, duke ngritur pikëpyetje mbi efektet afatgjata të operacionit ushtarak.
Politikani izraelit kritikoi gjithashtu kryeministrin Benjamin Netanyahu, duke e cilësuar jorealist objektivin për rrëzimin e regjimit iranian. Sipas Golan, udhëheqja izraelite humbi një mundësi strategjike, pasi nuk arriti të shoqëronte operacionin ushtarak me një strategji diplomatike për të garantuar sigurinë e vendit pas përfundimit të luftës.
Ai vlerësoi se, në vend që të përmirësonte pozitën e Izraelit, fushata e fundit ushtarake e ka përkeqësuar atë në planin strategjik. Golan ia atribuoi përgjegjësinë për përcaktimin e objektivave, drejtimin e operacionit dhe rezultatet e tij kryeministrit Netanyahu.
