Kreu i Partisë Demokratike, Sali Berisha, ka bërë thirrje për një protestë kombëtare më 8 shkurt, duke e cilësuar atë si një nga tubimet më të mëdha dhe më të fuqishme në historinë e vendit.
Gjatë një konference për mediat, Berisha i bëri thirrje qytetarëve t’i bashkohen opozitës në këtë protestë, duke denoncuar ashpër qeverinë aktuale.
“Ditën e shtunë, më 8 shkurt, shqiptarët do të ngrihen në këmbë për të treguar mospajtimin e plotë me këtë grup kriminelësh që kanë bërë gjithçka për një Shqipëri pa opozitë. Ky regjim ka shkaktuar dëme të mëdha dhe po përpiqet të vazhdojë me abuzimet e tij të pashtershme,” deklaroi ai.
Berisha theksoi rëndësinë e pjesëmarrjes masive të qytetarëve, duke bërë apel që “e gjithë Shqipëria të jetë në Tiranë” për t’i treguar qeverisë kundërshtimin e popullit ndaj, siç ai e cilësoi, “keqqeverisjes dhe grabitjes së pasurisë kombëtare”.
