Një grup i strukturuar kriminal, i përfshirë në shitjen e dozave të kokainës, është goditur nga policia në kuadër të operacionit të koduar “Zona”. Pas një hetimi gjashtëmujor, tre persona janë vënë në pranga, ndërsa dhjetë të tjerë janë shoqëruar për verifikime.
Sipas njoftimit zyrtar, në pranga kanë rënë vëllezërit A. P., 30 vjeç dhe M. P., 32 vjeç, të cilët konsiderohen si organizatorët kryesorë të aktivitetit kriminal, si dhe shtetasi O. L., 31 vjeç. Gjithashtu, janë proceduar në gjendje të lirë shtetasit V. Rr. dhe S. B., ndërsa më herët, gjatë hetimeve, është arrestuar shtetasi E. T.
Gjatë operacionit, policia ka sekuestruar dhjetëra doza kokaine, tre armë gjahu, një armë sportive, një armë të ftohtë, municion luftarak, dy peshore elektronike si dhe shuma të konsiderueshme parash në euro dhe lekë, të përfituara nga shitja e lëndës narkotike.
Hetimet për këtë grup vijojnë nën drejtimin e Prokurorisë pranë Gjykatës së Shkallës së Parë Fier, për të përcaktuar përgjegjësinë penale të 10 personave të tjerë të shoqëruar.
