Policia ka dhënë detaje për një aksident të ndodhur pasditen e sotme në Vlorë, ku një 17-vjeçar mbeti i plagosur gjatë lundrimit me një mjet lundrues.
Sipas informacionit paraprak, ngjarja ka ndodhur rreth orës 16:50, ndërsa mjeti lundrues, i drejtuar nga shtetasi E. I., 32 vjeç, po lundronte nga Gadishulli i Karaburunit në drejtim të molit të Vlorës.
Gjatë lundrimit, njëri prej pasagjerëve, shtetasi S. Ç., 17 vjeç, dyshohet se ka rrëshqitur dhe ka rënë në pjesën e motorit të mjetit lundrues, duke pësuar dëmtime në këmbë.
I mituri është transportuar me ambulancë në Spitalin Rajonal të Vlorës, ku ndodhet nën kujdesin e mjekëve.
Ndërkohë, grupi hetimor, nën drejtimin e Prokurorisë, ka nisur veprimet procedurale për të zbardhur rrethanat dhe shkaqet e plota të ngjarjes.
