Ajet Lleshi, 28 vjeç, ka humbur kontaktet pasi kishte dalë në bjeshkë për të prerë dru. Në një moment, ai e ka kuptuar se kishte humbur orientimin dhe nuk arrinte të kthehej në shtëpinë e tij në fshatin Kishaj të Hasit. I riu ka telefonuar babanë për ndihmë, i cili menjëherë ka lajmëruar policinë.
Që prej orëve të para pas alarmit, një ekip i Shërbimit të Kërkim-Shpëtimit Malor të Kosovës, në bashkëpunim me policinë dhe banorët e zonës, ka nisur kërkimet për të.
“OPERACION! Një skuadër e ShKShMK ka filluar një operacion të kërkim-shpëtimit në qarkun e Kukësit, në fshatin Kishaj. Për më shumë informacione do të njoftoheni me kohë,” thuhet në një njoftim në faqen zyrtare në Facebook të ShKShMK.
Deri tani, kërkimet nuk kanë dhënë rezultat. Fatkeqësisht, moti i keq gjatë ditës së djeshme me reshje dëbore dhe temperatura të ulëta ka vështirësuar ndjeshëm operacionin e kërkimit.
