- Verën e kaluar kaloi një infeksion të rëndë në sy
Elton John ka pranuar se ka humbur shikimin, sipas raportimeve të mediave ndërkombëtare. Deklarata është bërë mbrëmjen e 1 dhjetorit në skenën e "Dominion Theatre" në Londër, gjatë një shfaqjeje gala të muzikalit të ri "Djalli vishet me Prada", për të cilin artisti ka shkruar muzikën. "Siç mund të dinë disa prej jush, kam pasur probleme dhe tani kam humbur shikimin," tha legjenda 77-vjeçare e muzikës. "Nuk munda të ndiqja shfaqjen, por u kënaqa," shtoi ai duke falënderuar bashkëshortin e tij, David Furnish, të cilin e cilësoi si mbështetësit kryesor. Në shtatorin e kaluar, autori i "Rocket Man" kishte pranuar se kishte mbetur me një "shikim të kufizuar" në njërin sy për shkak të një infeksioni të "rëndë", duke siguruar gjithashtu se ishte në rrugën e shërimit. "Gjatë verës pata një infeksion të rëndë në sy që fatkeqësisht më la me një shikim të kufizuar në njërin sy," kishte shkruar ai në Instagram: "Jam duke u shëruar, por është një proces jashtëzakonisht i ngadaltë dhe do të duhet kohë që shikimi të kthehet në syrin e prekur". Por mesa duket gjërat nuk kanë shkuar ashtu siç duhet, duke çuar në humbjen e shikimit. Vitin e kaluar, Sir Elton dha shfaqjen e tij të fundit të turneut të lamtumirës në Mbretërinë e Bashkuar përpara rreth 120 mijë njerëzve në Glastonbury.
