Banorët e Krujës dhe Fushë Krujës kanë dalë sërish në protestë për të nëntën herë, ku kërkojnë të drejtën e tyre për të pasur hyrje-dalje në autostradën Thumanë-Kashar.
Edhe ditën e sotme banorët thyen kordonin e policisë dhe kanë bllokuar rrugën. Kësaj radhe në mbështetje të tyre u përfshinë edhe shoferët e automjeteve të cilët ishin bllokuar nga kjo protestë.
Kjo është protesta e nëntë e mijëra banorëve, ndërsa janë të vendosur në kërkesën e tyre për të pasur akses në këtë aks rrugor.
Rruga Thumanë – Kashar është ndërtuar tërësisht me fondet e kompanisë private Gener 2. Edhe pse i kanë dalë disa herë në krah protestës se banorëve, asnjë nga drejtuesit apo deputetët e PD nuk e përmend emrin e kësaj kompanie me pronar Bashkim Ulaj.
Pagesa për këtë rrugë është 270 lek të reja. Edhe pse pretendohet se është totalisht investim privat, kompania Gener 2 kompensohet nga shteti shqiptar nëse në rrugën Thumanë – Kashar nuk kalojnë 28 mijë mjete në ditë. Kompensimi kap shifrën e 8 milionë eurove.
