Protesta e opozitës ka zgjatur për tre orë dhe u shoqërua me përplasje mes protestuesve, deputetëve të opozitës dhe forcave të policisë. Tubimi nisi në orën 17:00, kur qytetarët dhe drejtuesit e opozitës bllokuan disa nga pikat kryesore të Tiranës, tek Bashka, Rrethrrotullimi i “Zogut të Zi”, Rrugën e Elbasanit, Ura te Xhamia, Sheshin Willson dhe Pallatin me Shigjeta.
Situata u tensionua shpejt tej rruga e Elbasanit dhe Bashkia e Tiranës, kur protestuesit janë përplasur me policinë, e cila ndërhyri me përdorimin e gazit lotsjellës dhe autoboteve me ujë për të shpërndarë turmën. Përfaqësuesit e opozitës akuzuan policinë për provokime dhe përdorim të dhunës ndaj protestuesve, ndërsa ka theksuar se protesta ishte e ligjshme dhe paqësore.
Kryetari i grupit parlamentar të Partisë Demokratike, Gazment Bardhi, ka deklaruar se protestat ishin njoftuar dhe se nuk kishte arsye për dhunën e përdorur nga policia. Ai shtoi se "policia, në vend që të luftonte krimin e organizuar, ka dhunuar qytetarët e zakonshëm".
Situata është bërë më e tensionuar në Sheshin Willson, ku deputetë të PD dhe Sekretari i Përgjithshëm i Partisë së Lirisë, Tedi Blushi, janë ngjitur mbi autobotin e ujit për të penguar përdorimin e tij. Kjo bëri që forcat e rendit të përdornin sërish gazin lotsjellës.
Përveç tensioneve dhe përplasjes fizike, disa protestues kanë pësuar lëndime dhe janë shoqëruar në komisariat. Megjithatë, protesta është mbyllur në orën 20:00, me qarkullimin e automjeteve që ka filluar të normalizohet, pas tre orësh përplasje dhe tensione. Opozita ka theksuar se do të vazhdojë me protesta të tjera deri në realizimin e kërkesave të saj.
