Përballjet mes dy skuadrave datojnë që në 7 tetorin 1946 në një ndeshje në "Qemal Stafa" të Tiranës. Kombëtarja jonë mposhtej 2-3 nga ish-Jugosllavia e asaj kohe për Kampionatin Ballkanik. Po në Tiranë më 14 shtator 1947, Shqipëria humbiste sërish 2-4 nga ish-Jugosllavia. Ndeshja e radhës ishte në Beograd, me dy skuadrat që barazuan 0-0, më 27 qershor 1948.
Pas 19 vitesh dy skuadrat u përballën sërish në Tiranë më 14 maj 1967, me ish-Jugosllavinë që fitoi 0-2 në "Qemal Stafa" për kualifikueset e Europianit 1968. Në ndeshjen e kthimit në Beograd, ishin vendasit që fituan 4-0 kundër tanëve më 12 nëntor 1967.
Pas shpërbërjes së ish-Jugosllavisë dy skuadrat u përballën më 14 tetor 2014 në Beograd, në ndeshjen që Shqipëria e fitoi 0-3 në tavolinë, por që nuk quhet një fitore në fushë nga UEFA. Sfida e kthimit në "Elbasan Arena" u fitua nga Serbia 0-2 më 8 tetor 2015, me tifozët shqiptarë që ishin të përzgjedhur, aq sa u quajtën 'tifozët me kravata'. Ndeshja e fundit më 7 qershor të këtij viti në Tiranë përfundoi 0-0.
Në total, hiq fitoren 0-3 në tavolinë të Shqipërisë, Serbia na ka mposhur pesë herë dhe skuadrat në dy raste janë ndarë në barazim. Katër gola ka shënuar ekipi ynë, kundrejt 15 të pësuarve. Duket se ka ardhur koha që Shqipëria të fitojë në fushë kundër Serbisë dhe ndeshja e radhës është pranë, edhe pse me shumë emocione.
