Spanja nuk festoi vetëm triumfin në Kupën e Botës 2026, por dominoi edhe ceremoninë e çmimeve individuale të turneut. Mesfushori spanjoll Rodri u shpall lojtari më i mirë i Botërorit, ndërsa ylli francez Kylian Mbappe fitoi “Këpucën e Artë” si golashënuesi më i mirë i kompeticionit.
Rodri u vlerësua me “Topin e Artë” të Adidas, çmim që i akordohet futbollistit më të spikatur të Kupës së Botës. Vendimi u mor nga Grupi i Studimeve Teknike të FIFA-s, pas paraqitjeve të tij gjatë gjithë turneut.
Pas tij u rendit kapiteni i Argjentinës, Lionel Messi, i cili mori “Topin e Argjendtë”, ndërsa Kylian Mbappe u pozicionua i treti duke fituar “Topin e Bronztë”.
Sulmuesi francez ishte protagonisti kryesor në repartin ofensiv, duke mbyllur Botërorin me 10 gola dhe 4 asistime në 769 minuta lojë. Me këtë paraqitje, Mbappe siguroi “Këpucën e Artë”, duke lënë pas Lionel Messin me 8 gola dhe 4 asistime.
Në podiumin e golashënuesve u rendit edhe Jude Bellingham. Mesfushori i Anglisë fitoi “Këpucën e Bronztë” pasi realizoi 7 gola dhe dha një asistim.
Dominimi i Spanjës u shfaq edhe në çmimet e tjera. Portieri Unai Simon u shpall më i miri i turneut, duke fituar “Dorezën e Artë” të Adidas, ndërsa talenti Pau Cubarsi mori çmimin e lojtarit më të mirë të ri të Botërorit.
Çmimi “Fair Play” i FIFA-s shkoi për Holandën, për sjelljen sportive gjatë gjithë kompeticionit.
Botërori 2026, i pari me 48 kombëtare pjesëmarrëse dhe i organizuar nga Shtetet e Bashkuara të Amerikës, Kanadaja dhe Meksika, regjistroi gjithashtu shifra rekord në tribuna.
Sipas të dhënave të FIFA-s, 6,810,996 tifozë ndoqën 104 ndeshjet e zhvilluara, me një mesatare prej 65,490 spektatorësh për takim. Stadiumet u mbushën në 99.7% të kapacitetit të tyre, duke e bërë këtë edicion një nga më të ndjekurit në historinë e Kupës së Botës.
