Nis në Gjykatën e Posaçme procesi ndaj kryebashkiakut të Tiranës, Erion Veliaj. I pandehuri nuk ishte i pranishëm, pasi sipas trupës gjykuese, Drejtoria e Burgjeve nuk ka zbatuar urdhrin e gjykatës për shoqërimin e tij.
Avokati i Veliajt, Plarent Ndreca, tha se mungesa e tij përbën shkak për shtyrjen e seancës, pasi ai nuk ka shprehur vullnet nëse do të marrë pjesë apo jo në gjykim.
“Duhet të garantohet e drejta e çdo të pandehuri për t’u njoftuar. Fakti që zoti Veliaj nuk e ka shprehur vullnetin e tij nëse do të marrë pjesë në seancën e sotme, mendoj që pamundëson vijimin e gjykimit”, tha Ndreca.
Prokurori i SPAK, Altin Dumani, u shpreh se nga rrethanat e paraqitura rezulton se i pandehuri nuk është njoftuar, edhe pse gjykata ka urdhëruar njoftimin e tij.
“Na rezulton se Drejtoria e Burgjeve nuk ka zbatuar urdhrin e gjykatës. Po ashtu, duhet të mësohet përse nuk është zbatuar ky urdhër, pasi nuk është hera e parë dhe mosnjoftimi i të pandehurit po bëhet shkak për shtyrjen e seancës. Nëse gjykata vendos ta shtyjë, kërkojmë që të caktohet një datë sa më e shpejtë”, tha Dumani.
Seanca e radhës u shty për në datën 27 prill.
Veliaj akuzohet për 13 vepra penale, nga korrupsioni, pastrimi i parave, fshehja e pasurisë etj.
