Në Lushnjë, aty ku fermerët përballen çdo ditë me çmimet, kostot dhe tregun, Kryeministri Edi Rama dhe Belinda Balluku ofruan një diagnozë të pazakontë për problemet e bujqësisë shqiptare: jo mungesa e parave, jo subvencionet e pakta, jo tregu i paqëndrueshëm, por… media.
Në takimin me fermerët, Rama u përpoq të zhvendosë debatin nga paratë tek “mentaliteti”. Sipas tij, sot problemi nuk është më mungesa e financimit, por mënyra se si njerëzit e shohin bujqësinë dhe paragjykimet që krijohen rreth saj. Në këtë logjikë, pengesa kryesore duket se nuk janë arat e mbushura me borxhe apo prodhimet që shpesh shiten nën kosto, por “tenxheret mediatike” dhe “pazari i thashethemeve të Tiranës”.
“Nuk është paraja çështja jonë kryesore sot”, tha Rama, duke shtuar se sfida është të kuptohet se si mund të sigurohet paraja për të ecur përpara.
Për fermerët që prej vitesh ankohen për mungesën e mbështetjes, kjo deklaratë tingëllon si një paradoks i vogël politik: paratë nuk janë problemi, por duhet të gjejmë mënyrën për të siguruar para.
Retorika e re duket se kërkon të bindë se bujqësia shqiptare pengohet më shumë nga perceptimi sesa nga realiteti ekonomik. Pra, sipas kësaj filozofie, problemi nuk është në arë, por në ekran.
Nëse kjo është diagnoza e re e qeverisë për sektorin bujqësor, atëherë fermerët e Lushnjës mund të kenë mësuar një gjë të rëndësishme nga ky takim: në Shqipëri, ndonjëherë krizat nuk vijnë nga mungesa e zgjidhjeve, por nga mënyra si flitet për to.
