Biznesmeni Behgjet Pacolli ka deklaruar se kompania MABCO Constructions SA do të ndjekë rrugën e arbitrazhit ndërkombëtar pas nisjes së procedurës nga Ministria e Infrastrukturës dhe Energjisë për zgjidhjen e kontratës së koncesionit për Aeroportin Ndërkombëtar të Vlorës.
Në një reagim publik, Pacolli bëri të ditur se kompania ka marrë njoftimin zyrtar nga ministria për fillimin e procedurës, duke e cilësuar këtë veprim si një përpjekje për t’i hequr investitorit të drejtat që burojnë nga kontrata e partneritetit publik-privat.
Sipas tij, MABCO ka zgjedhur për më shumë se një vit dialogun dhe rrugën institucionale për të shmangur një përplasje ligjore ndërkombëtare, por tashmë, sipas tij, nuk ka më alternativë tjetër përveç mbrojtjes së interesave të saj përmes mekanizmave juridikë.
Pacolli pretendon se gjatë kësaj periudhe kompania është përballur me një sërë problematikash, përfshirë tentativa për ndryshimin e strukturës së pronësisë, masa gjyqësore kontradiktore, përjashtimin nga administrimi i investimit dhe pengesa në aksesin në kantier.
“Pikërisht në kohën kur projekti kishte hyrë në fazën përfundimtare dhe ndodhej vetëm pak para certifikimit, investitori u pengua të përmbushte detyrimet kontraktore”, deklaroi Pacolli, duke shtuar se sot këto pasoja po përdoren si argument kundër kompanisë.
Biznesmeni kosovar ka kundërshtuar pretendimet e Ministrisë së Infrastrukturës dhe Energjisë, duke thënë se ato nuk përputhen me faktet dhe dokumentacionin e projektit. Ai ka argumentuar se procedura bie ndesh me kontratën e koncesionit, vendimin e Gjykatës së Lartë dhe marrëveshjen për mbrojtjen e investimeve mes Zvicrës dhe Shqipërisë.
Pacolli deklaroi gjithashtu se që prej gushtit të vitit 2025 ka kërkuar një auditim të pavarur ndërkombëtar teknik dhe financiar për investimet në Aeroportin e Vlorës, kërkesë që sipas tij nuk është marrë parasysh nga institucionet.
Ai akuzoi gjithashtu organet shqiptare të hetimit për mosveprim ndaj kallëzimeve penale të bëra nga MABCO për veprime që kompania i konsideron të kundërligjshme.
“Ky nuk është një konflikt që MABCO e ka kërkuar. Është pasojë e drejtpërdrejtë e veprimeve dhe mosveprimeve të atyre institucioneve që kishin detyrimin ligjor të mbronin shtetin e së drejtës, kontratën dhe investimin”, u shpreh Pacolli.
Sipas tij, në procesin e arbitrazhit kompania do të paraqesë të gjitha faktet, provat dhe dokumentacionin që disponon, duke shprehur bindjen se procedura do të nxjerrë në pah të vërtetën mbi konfliktin.
Qeveria shqiptare nuk ka reaguar ende ndaj deklaratave të biznesmenit Behgjet Pacolli.
