Vetëm pak kohë pas inaugurimit të ndërhyrjeve në lagjen “Naim Frashëri” në Pogradec, reshjet e shiut kanë nxjerrë në pah probleme me sistemin e kullimit të ujërave.
Pusetat u bllokuan, ndërsa uji vërshoi në rrugë, duke krijuar pamjen e një “lumi” në mes të lagjes muze.
Situata ngre pikëpyetje mbi cilësinë e punimeve të kryera dhe funksionimin e rrjetit të kanalizimeve. Edhe pse zona është rehabilituar dhe inauguruar vetëm pak kohë më parë, sistemi i kullimit nuk arriti të përballonte reshjet, duke sjellë grumbullimin e ujit dhe përmbytjen e rrugëve.
Pamjet nga zona tregojnë sasinë e madhe të ujit të grumbulluar, ndërsa problematika rikthen në vëmendje efektivitetin e investimit të realizuar në këtë lagje të Pogradecit.
